話說我係香港公開大學(The Open University of Hong Kong)辦全日制之後嘅第一屆畢業生，當時聽啲老師講，好似話公開大學本來叫「開放大學」，我即時諗到「開大」🤣
當年，好多同學都怕被其他人睇低，但老師不停鼓勵我哋，苦口婆心咁去訓練我哋建立獨立思考力、要尋根究底，因為英雄莫問出處。有一次我同其中一個Professor傾偈，我話「我好想好想做作家」，佢好認真咁望住我，諗咗一陣，然後好坦白咁同我講：「我都覺得你適合，不過、你要學吓處理果種高低起伏，因為作家係孤獨嘅職業，有時你好有希望，有時好似好失望。」感覺上，佢真係好留意我，或者佢本來就好留意每一個學生。成敗起伏，朝早希望晚上失落，正正係我仍然學緊嘅課題。
11年過去，我做到喇🥰早前收到大學嘅通訊，好似問我哋有無名提議之類，但我無覆到，心諗教授們老師們一定會諗個好名，事關我當年遇到嘅九成都係好老師，而佢哋大部份都仲喺度教。
最後，好似話叫「都會大學」。雖然，個人始終對公開大學呢個名有情意結，但我諗都好嘅：願都會繁盛，依然似昔。
唔知我嘅讀者之中，有無師妹師弟？各位師妹師弟，加油！我都係你嘅同鄉呀🤣
Search